Грек улсын Афин хотноо 2024 оны 10 дугаар сарын 18-20 ны өдрүүдэд үргэлжлэх “Хүрээлэн буй орчны төлөвлөлт ба эрүүл мэнд (Environmental Design and Health)” сэдэвт олон улсын эрдэм шинжилгээний хурал өнөөдөр эхэллээ. Тус хурал нь тогтвортой хөгжил, орчны бохирдол, бохирдуулагчид хийх дүн шинжилгээ, циркуляр эдийн засаг, эрчим хүчний тогтвортой байдал, уур амьсгалын өөрчлөлт, хүрээлэн буй орчны боловсрол, бодлого, түүний эрүүл мэндэд үзүүлэх нөлөө, үнэлгээ, орчны өөрчлөлтийг нийгэм хүлээн зөвшөөрөх байдал зэрэг чухал сэдвүүдийн хүрээнд явагдаж байна.
Хурал танхим, цахим хосолсон хэлбэрээр явагдаж байгаа бөгөөд нийт 118 илтгэл хэлэлцэх юм. Уг хуралд ГУИС-ийн Эрдэм шинжилгээ, инноваци эрхэлсэн дэд ерөнхийлөгч, профессор, анагаахын шинжлэх ухааны доктор Н.Удвал, Ахисан түвшний сургуулийн захирал, доктор, профессор Д.Нармандах, Сувилахуйн сургуулийн багш, доктор А.Эрдэнэбат, Ахисан түвшний сургуулийн багш, доктор Ж.Гэрэлмаа нар “COMPARATIVE STUDY ON SOME INDICATORS OF ENVIRONMENTAL PERFORMANCE INDEX AND POLLUTION RELATED HEALTH IMPACTS IN THE NORTHEAST ASIAN COUNTRIES” (Зүүн хойд Азийн орнуудын хүрээлэн буй орчны гүйцэтгэл, бохирдолтой холбогдох эрүүл мэндийн нөлөөллийн зарим үзүүлэлтийг харьцуулан судлах нь) сэдэвт илтгэл хэлэлцүүллээ.
Тус хуралд ГУИС-ийн Ахисан түвшний сургуулийн “Эрүүл мэндийн удирдлага” хөтөлбөрийн магистрантууд оролцож байна. Гурван өдөр үргэлжлэх уг хурлын дараа магистрантуудад сертификат олгох юм.
ХУРЛЫН ҮЙЛ АЖИЛЛАГААНД АМЖИЛТ ХҮСЬЕ.
Улаанбаатар хот
2024.10.18
